الشاعر بن روق وأخيه أبوفيصل ( بدع ورد )............

[أبوفيصل]

بسم الله الرحمن الرحيم

إسمحوا لي أن أتقدم بجزيل الشكر ووافر الإمتنان للحبيب الغالي ورفيق الدرب الموالي وصاحب القلم والفكر والأدب والشعر أبو سلطان بن روق سلمه الله على مشاعره الصادقه وأبياته الوافيه والثناء عليّ بما أسأل الله أن أكون أهلا له وهذا من طيب ذاته وكرم نفسه وحسن ظنه بنا ......

بدع أبو سلطان بن روق وتحته ردي عليه ........


سالم ماجور يالرمز الحلافي
يا رفيق الخير يا ذخر الجماعة

صاحب ن دايم مع الاصحاب وافي
مثل نجم ن يعجب العين ارتفاعه

حايز ن للمدح و فعولك تشافي
بين وجه وبين علم وبين طاعة

وموقفك عند الوفى ما هوبخافي
حاضر ن في صف ربعك كل ساعة

جعل مايلحقك هم و لا خلافي
و جعلك من اللي ينالون الشفاعة

الليالي ما تجي دايم عوافي
وغير فعل الخير ما فيها طماعه

البنادم يوم جاء للكون لافي
بين ساعة مولده حتى وداعه

كنه مسافر مع طوال الفيافي
شايل ن زاده على قد انتفاعه

و في حديث المصطفى مضمون كافي
قبل لا يخطي مسافر في ضياعه

وان غفينا خصمنا ما هوب غافي
خصمنا الشيطان ما نجهل طباعه

نلتجي بالله و ستر الرب ضافي
يالله ان تجعل لنا ضده مناعة

و الختام ان طال بي نظم القوافي
الفضا ما ضاق فالعين اتساعه

المشاغل تعترض و الوقت جافي
و اعتذر لو كان طولت القطاعة

يا عساك بخير يالقرم السنافي
يا رفيق الخير يا ذخر الجماعة


الرد : أبو فيصل

مرحبا ترحيب وافٍ لاجل وافي
ياسليل الفخر ياساس الشجاعه
***
شاعرٍ له بيرقٍ فوق النوافي
أفتخر حين أمدحه حب وقناعه
***
من سلايل روق مروين الرهافي
ما يربون الهفي راعي المياعه
***
مرحباً مثل المطر لانشأ الروافي
ودندن الرعّاد والبرّاق لاعه
***
وعل سيله لين صار السيل صافي
وتاه خِيّاله بوكنــه وإتساعه
***
وصارت أرضه شبه منقوش يشافي
فوق كف مسلهمٍ مد بذراعه
***
وربعت في حلةٍ خضرى الوصافي
تلهب العاشق وينشدها يراعه
***
كنها لوحة على وجه الغلافي
من خيالٍ خطها فن وبراعه
***
يابو روق إن سقت موروث القوافي
فمركبك فوق البحر عالٍ شراعه
***
وأنت لك في القلب مكنونٍ يظافي
وخوتك يالشهم للوافي طماعه
***
والخبر ذا شفت يالغالي عوافي
زارنا الغائب وراح بنصف ساعه
***
وشفت مما صار شيءٍ كان خافي
نحمد إللي غايتي عنده وداعه
***
أسأله عفوه إلى ما جيت لافي
والمرض يارب جنبني صراعه
***
وإكف بوسلطان ألا ياخير كافي
ومد في عمره على تقوىً وطاعه
***
فإن نظمت القاف بإسمي وإحترافي
ياصلك بالويب من قبل الطباعه
***
سطره شوقي لك بيوتٍ نظافي
وعطره بالطيب من غالي البضاعه
***
خوتك فخرٍ وأنا خوك الحلافي
يا سنا نجد العذية يا سباعه
***
وعد من لبى وكبر للطوافي
ألف صلى الله على راعي الشفاعه
*************
25/01/1433 أبو فيصل

[ذيب العرب]

صح اللسان الشاعر ابن روق
وصح اللسان المبدع الاستاذ / ابو فيصل
ولاهنتوا جميع

[ابن عميش]

وعد من لبى وكبر للطوافي
ألف صلى الله على راعي الشفاعه

بيض الله وجيهكم

[بن ناصر]

صح الله السنتكم جميعا

[الصاروخ]

صح الله السنتكم جميعكم مبدعين كعادتكم
تقبلو مروري على متصفحكم الرائع

[أبو طلال]

صح الله اللسنتكم جميع وبيض الله وجوهكم شعار

من العيار الثقيل

في هذا الصرح الشامخ لكم ودي وتقديري

[ابو محمد ومنتهى وعبدالاله]

ابو فيصل وابن روق

اسأل الله ان يحرّم وجيهكم على النار .

ويشهد الله في سماه ان لكل واحد منكم في قلبي معزه وحب وتقدير ما يعلمه الا فاطر السماوات والارض .

ويشهد الله اني كنت احاول اقتبس من قصيدة كل واحد ما يوفي قدر الثاني .

ولكن .. بالرغم من جزالة الشعر وروعة المعاني واختيار المفردة البلاغية الراقية في الوصف التي لا يجديها الا الشعراء الكبار (امثال ابو فيصل وابن روق من غير نقص في قدر شعراء المنتدى) كل هذا لم يشفع ان اختار بيت او مجموعة ابيات بالرغم من علو قامة الشاعر ونجومية القصيدة .

والسبب باختصار شديد ان كلا الشاعرين يفوقان كل وصف وكل قصيدة .

لله دركم يا اهل الروعة والابداع .


وطيّب الله ايامكم

[ماجلان العرب]

عشتوووووووو والله لا يهينكم جميع لا انت ياأبوفيصل ولا اخونا ابن روق ........
محاوره جميله وشعراء مميزين
صح الله ألسنتكم على القصايد

ولكـ خالص تحياتي واحترامي وودي