ديوان الشاعر / علي بن مسفر بن حسن الحلافي

[ابو محمد ومنتهى وعبدالاله]

( القصيدة الاولى )

قصيده مسيره في وفاة الملك فهد رحمه الله


يالله عاون على الدنيا وتأويلها وأحداثها
يوم الاثنين في سته وعشرين جاء من شهر سته
يانبا جاء على الشعب السعودي وياء شينك نباء
الاذاعه مع التلفاز ذاعة بعلم مالنابه
غير ذي حكمة المولى ليا قال للشي كن يكون
قالو إن خادم البيتين فارق حياته وإنتهى أجله
قلنا لاحول ولا قوة إلا برب العالمين
يا فهد لو يكون مطلوب منا الفداء كنا وصلنا
والله إن نرخص الغالي وكله من أجلك يافهد
لانك في خدمة الاسلام ذا ياهب الغالي رخيص
أنت ذا عمر البيتين للمسلمين وكل زاير
وبعد في خدمة الشعب السعودي عملت المستحيل
والمشاكل ليا صعبة يقال الفهد حلالها
كيف ننساك يابو فيصل ويدك البيضاء الكريمه
ياعسالك في الفردوس منزل وباعلى منزله
العوض جاب بو متعب وبو خالد الليث المحنك
الله يرحم ثرى عود على العز وخركم لنا
والولاء نعلنه لملوكنا ولولي العهد منهم
الملوك الذي في خدمة الشعب ما تبخل بشيء
يكفلون اليتيم أوالارمله والشيوبه والعجايز
والضمان أعلنوا بزيادته لجل من يحتاج له
يابو متعب حبيب الشعب حنا جنودك وأبشر أبشر
الله ياخادم البيتين يحفظك ويديمك لنا

[ابو محمد ومنتهى وعبدالاله]

( القصيدة الثانيه )

للشاعر / علي بن مسفر الحلافي

يالله إنك دلنا على الحق وان تصلح قلوبنا
فين هو الشعب السعودي صانع التاريخ وآلامجاد

حن سعوديين نرفع روسنا وأعلامنا مرفوعه
ماتفرقنا قلال الدين واعقول مظللة

ما نشا بيناتنا شيعي ولا بعثي ولا علماني
كلمة التوحيد رايتنا ومنهجنا وشرعنا

ياولات آلامر حن رهن آلاشاره للولاء والطاعه
نرخص الروح العزيزه في رضاكم ياملوكنا

ياولي العهد من رامك بشر مات قلبه حسرة واندامه
الله إن يجعل مصيره في درا كيده وشر أعماه

أبشر بالشعب السعودي ما يهاب الموت والاخطار
نلبس البدله ونرمي بالطواقي والعمايمي

[ابو محمد ومنتهى وعبدالاله]

( القصيدة الثالثه )

للشاعر: علي مسفر حسن الحلافي


الله من علة في الكبد تطويها
طي الرشاء من على مطوية الجالي

ماها شحيح ومشاهيب ظواميها
حادنها من سموم القيض حدياني

الكبد من مابها يبست عراويها
والقلب كانه يصالا فوق نيراني

يابو سعد خليت الديره ومن فيها
من يوم ما عادبه للبدو مقطاني

الديره الي ربينا في روابيها
واليوم ماعادبه شيء ولا كاني

خل الغنم لا تجي ليه بطاريها
من يوم بيت الشعر ما عادله باني

ومن يوم ماهم بهلها ذا تقديها
ماغير هندي وبنقالي وسوداني

والبل فراحت معا هلها وماضيها
عدنا على صنعة إمريكي وياباني

أهل البل إلي تشجعك بعزاويها
يردون حوض الخطر بالصدق شجعاني

واليوم مقطانها الشبك ومرابيها
تشاركوا في الخطا حضر وبدواني

إيجهز الشبك قبل إيروح يشريها
إيقول أنا بشري إبل إفلان وإفلاني

فن كان دعواي حي يعترض فيها
عندي على حجتي ثبت وبرهاني

الحجة الباطلة مانيب راعيها
والحجة الصدق مثل النور لاباني

[ابو محمد ومنتهى وعبدالاله]

( القصيدة الرابعه )

للشاعر: علي مسفر حسن الحلافي


قصيده وصيه لأحد أبنائه


يالله يلي سايلك ما يخيبي
يعلم قلوب الناس في سر وإجهار

تحفظ وتهدي فإنك انت القريبي
ما غيرك إمريده ولا غيرك اختار

انا أمس الضحى في ساعةٍ بان شيبي
أرقب لحس الطائره حين ما طار

أقول ياطيار ليتك قريبي
وأكتب حروف من دموعي بلسطار

وبعد العصرعديت قبل المغيبي
رجم تعلوى عن طويلات وإقصار

أنشد سوات إمضيعٍ له ذهيبي
ما لقي له علم ولا لقي له أخبار

من الدار وأهل الدار كني غريبي
ولا كن لي بالدار حي وتذكار

فارجيل لظافر كل ما حن جيبي
ربه يسلينا من إكبار وإصغار

والا سعيد إنه صديق وقريبي
حيث ان بو عبدالله أعز ماختار

إلي والله إلا طالب إو لاطليبي
راحو لهل دار وحن يم هل دار

فيا راكب جمس وشكله غريبي
توه جديد ما بعد راح مشوار

العكس والبنيون وزنه قطيبي
وإليا عطى مع رقه ثور إغبار

عليه شغموم حكيم وأديبي
متعلم ولقيادة الجمس جبار

حر ولد حر وساسه عريبي
لاهوب لا خبل ولا هوب ثرثار

يمشي ليا دن القمر للمغيبي
بعد نصيف الليل وإقبال الاسحار

والفجر من شقرى يجنب جنيبي
وبالرياض إيقيف وحط لفطار

دار لنا فيها امل مايخبي
دار الملوك إليّ كريمين وأخيار

آل السعود إمزبنين الطليبي
وإحما الوطن من كل خاين وغدار

وتلفي به الدمام لا يانديبي
قبل الضحى يشتد والوقت مقدار

منصاك بو بندر عساله نصيبي
بحظ تعلوى والمثايير عثار

أبشر بترحيب وقدر عجيبي
وقولت هلا من خاطر مابه أكدار

إستدع بو طامي ومن بيت طيبي
مثله سديد في اللوازم ليا سار

نرجيه في يوم شديد تعيبي
حيث الحرار إبوكرها تخر أحرار

عطهم سلام من زباد وطيبي
أحلى من العنبر ومن در الابكار

وقل بو علي في جالكم لا يسيبي
مع الذي ما حسبوا العيب والعار

فيا بو علي بوصيك والذيب ذيبي
ترى وصات الوالدين أعظم أوقار

هذا وصلوا على النبي الحبيبي
إعداد من حجوا بمكه ومن زار

[ابو محمد ومنتهى وعبدالاله]

( القصيدة الخامسه )

للشاعر: علي مسفر حسن الحلافي

طلبت رب البيت عدل الجلالي
إليّ عليه الامر والملتجا له

رب عليه إمردتي واتكالي
ما خاب من هو مسنده واتكاله

إنه يثبتنا لنطق السوالي
لامن كل قام ينطق سؤاله

في ساعة قفوا الاهل والعيالي
لا سائل عنا ولا من نساله

فنا ليا سولفت بين الرجالي
أنقا سمان الهرج وأخذ إجلاله

أعز نفسي عن دروب إهزالي
وأجزع وعدي عن دروب الهزاله

المهزله لاهيب مني ولا لي
المهزله درب الردى والرذاله

أبوي وصاني بدرب المعالي
ودرب العلا ماكل رجل يناله

ورث لنا من عهد جد وتالي
نتعب على درب الوفا ونعنا له

والشعر لامنه بدا له مجالي
لنا بباب الشعر صاله وجاله

فماهوب شعري كذب والا خيالي
يوم إن بعض الشعر كذب أو خياله

شعري ماهو لمن سعات الدلالي
أذكر حسين الوصف وأذكر دلاله

شعري لربعي مثل عد الريالي
أهل الوفا وأهل الشرف والشكاله

لا حلق المجلس وصفر الدلالي
وكل بكاس العز يشرب بداله

أشرب مع ربعي بمر وحالي
لاون مشربهم كثير إحثاله

وأطلع معى ربعي طويل وعالي
يوم الردي يقصر وتقصر إحباله

تقصر إحباله عن طويل المدالي
وخيم عليه الهم واعزتاله

وإن شفت علم من ردي السبالي
أبعد عنه وأروح مالي وماله

يلقى شبيهٍ له بطرقه يلالي
ما معهم إلا يالالاله يلاله

أروح منهاج من الناس خالي
وابعد عن دروب الحقد والنذاله

إلي سوالفهم مسا قيل قالي
ما يحسب الرجال هرجه وقاله

فوقت تساوابه رخيص وغالي
كل على طرقه يغني لحاله

الضبع والثعلب تمد الحبالي
وقام الاسد والنمر يطوي إحباله

وإن شفت جفوى من رفيق موالي
أبعد عنه خله على ماطرى له

تاجيبه الايام هي والليالي
وتعكر بجوه بدل صفاله

فـ صلاة ربي عد ما انشا الخيالي
على النبي المحبوب أمين الرساله

[ابو محمد ومنتهى وعبدالاله]

( القصيدة السادسه)

للشاعر: علي مسفر حسن الحلافي

هذه قصيده أثنا طلعه بريه وتذكر حياة الباديه والمنازل القديمه


يا الله يامطلوب ياخير رازق
وكل روح رزقها من حسابها

أنا أطلبك تغفرلي وتمحي خطيتي
والروح في رحمتك خفف عذابها

أنا أمس العصرعديت في راس مرقاب
ومن طلعتي والكبد زاد إلتهابها

هيض عليّه مامضى لي وما بعد
والعين قل يامزنة من سحابها

تذكرت ربعي أهل الوفا والحميه
هل نزلةٍ يفرحها من لجابها

ربع تعز الضيف والجار والخوي
ولهم مواقيف وكل درابها

فليا إعتزوا بالعزوة المحلفيه
وطار عن بيض الصبايا إحجابها

ما فيهم إلي بايقٍ في خويه
على الوفا شيبانها مع شبابها

وكل القبايل نعم ماخص حقهم
مثل السيوف المرهفه في نصابها

تراي من يذم القبايل بيندم
روحه على درب المخاطر رمى بها

اليوم في حكم عسا الله يديمه
ساد الجزيره وإهتنت في شرابها

عبدالعزيز الله يرحم إعظامه
إلليّ لدرب الخير حث أومشابها

أخر حرار في معالي وكورها
عدوها في كل موقف يهابها

اسعود وفيصل ثم خالد عساهم
في جنة الفردوس يكتب ثوابها

ومن بعدهم فهد إحتمل للامانه
بالعدل والحكمه وسنة إكتابها

وعبدالله و سلطان لطامة العداء
عضود الفهد ومزبنة من وزابها

كل أسرة آل سعود غيث على الوطن
تواريخهم تشهد وكل حكى بها

ملوكنا منا وفينا وعزنا
لاجات ميلات الدهر وانقلابها

فلا هاضني إلا دار حي لقيتها
محدها الوادي وسند إهضابها

مريت من دار لهم بعد مده
حيّ رحل منها وحيّ بقابها

الله يرحم من رحل منك ديره
والحي في حلو الحياه إهتنابها

ولاهاضني إلا سدرةٍ جال وادي
كم بيوت جالها أرست أطنابها

وياكم فيها حلقوا من مشوره
وياما تدارج فيها مع غدابها

واليوم شفت السدر يبست إغصونه
شدوا مراحيله ودنوا ركابها

فيا مسفر أنا أوصيك وإسمع وصاتي
مثلك إلى جات الوصاه إعتنابها

أهلك خوالك ساس عودٍ مجرب
في كل موقف والمثل ينقدابها

الاوله بوصيك في طاعة الله
من طاوع الله مايخاطي صوابها

والثانيه بالبر في والدينك
وجدانك إبلحسان ترحم جنابها

والثالثه ضيفك إلى جاك عاني
قدم تراحيب يشرف جوابها

الضيف ضيف الله على كل حزه
وحذراك عينك لا يغضب إحجابها

أوصيك في ربعك إلباسك عن العدا
إلى هبت الغربي ودنا سحابها

إلى لفوك إصفطلهم كل غالي
ربعك إدروع و شمخ ينذرابها

رجل بليا ربع وش ينبغابه
ماتنفعه دنياه مهما جنابها

وإحذر تخاوي اللاش والخبل والدني
بعض العرب خوته وش ينبغابها

ناس مسا مابين خذها وهاتها
إضعاف النفوس ورزقها من هبابها

مثل العرادة ماتظلل بظلها
ماهيب لاتلجي ولا يلتجابها

إحذر أصحاب السوء قطاعة القفى
هرج النمامه والردى في زهابها

اتشوفهم مابين ذولا وذولا
هذا يوديها وهذاك جابها

خاو الرجال إلي تنومس خويها
دروب المراجل والشرف من حسابها

وإختامها مني صلاة على النبي
عدة حروف سطرت في كتابها

[ابو محمد ومنتهى وعبدالاله]

سيتم ادراج ما بقي من قصائد شاعرنا في هذا الديوان تباعاً ان شاء الله تعالى ...


وطيّب الله ايامكم